በቤጂንግ የግማሽ ማራቶን የሩጫ ውድድር ቻይናዊ ሯጭን ሆን ብለው አሸናፊ አድርገውታል የተባሉት ኢትዮጵያዊ እና ኬንያዊ አትሌቶች እንዲሁም አሸናፊው ቻይናዊ ሜዳልያቸውን ተነጠቁ።

አንድ ኢትዮጵያዊ እና ሁለት ኬንያውያን አትሌቶች ሆን ብለው ቻይናዊ ሯጭ እንዲያሸንፍ ማድረጋቸው ምርመራ ከተካሄደበት በኋላም ነው ውሳኔው የተላለፈው።

ባለፈው ሳምንት እሁድ በነበረው ውድድር ቻይናዊው ሂ ጂ 1፡03፡44 በሆነ ሰዓት ሲያጠናቅቅ ኢትዮጵያዊው ደጀኔ ኃይሉ ሁለተኛ እንዲሁም ኬንያውያኑ አትሌቶች እኩል ሦስተኛ ደረጃ ይዘው አጠናቀዋል ተብሏል።

ሶስቱ የምስራቅ አፍሪካ አትሌቶች ቻይናዊው ሯጭ ሆን ብለው እንዲያሸንፍ ማድረጋቸው ተዘግቦ ነበር።

ኢትዮጵያዊው ደጀኔ ሃይሉ፣ እና ሁለቱ ኬንያውያን አትሌቶች ሮበርት ኬተር እና ዊሊ ምናንጋት ፍጥነታቸውን በመቀነስ ቻይናዊው አትሌት እንዲያልፋቸው በጃቸው ምልክት የሚያሳዩበት ቪዲዮም ወጥቷል።

ሦስቱ አትሌቶች ከውድድሩ መጀመሪያ አንስቶ እስከ ማጠናቀቂያው ድረስ ቻይናዊውያን አትሌት አጅበው ሲሮጡ ነበር።

ኬንያዊው አትሌት ምናንጋት ሶስቱም አትሌቶች የሮጡት እንደ ውድድሩ አሯሯጭ (ፔስ ሜከር) መሆኑን ለቢቢሲ ተናግሮ ነበር።