ዱባይ እንጀራ አይጋገርም። ሳራም ሆነች ሌሎች ኢትዮጵያውያን የምግብ ቤት ባለቤቶች በተደጋጋሚ ሞክረውት ያልተሳካላቸው ነገር ዱባይ ውስጥ እንጀራ መጋገር ነው።

እንጀራው ዱባይ ሲጋገር ይደርቃል፣ በፍጥነት ጣዕሙ እና ቀለሙ ይቀየራል፤ ከዚያም በላይ የተስተካከለ ቅርጽ ይዞ አይወጣም።

ምናልባት ችግሩ ከውሃው ነው በሚል እሳቤ ውሃ ከአዲስ አበባ ጭነው በመውሰድ ለመጋገር ተሞክሯል። ነገር ግን ያም ቢሆን ለውጥ አላመጣም።

በዚህም ምክንያት አል ሐበሻን ጨምሮ በአረብ ኤምሬትስ የሚገኙ ሁሉም የኢትዮጵያ ምግብ ቤቶች የሚጠቀሙት ከኢትዮጵያ ተጋግሮ የሚሄድ እንጀራን ነው።

ወ/ሮ ሳራ አዲስ አበባ ውስጥ የራሷ እንጀራ መጋገሪያ አላት። በዚህ መጋገሪያ ውስጥ 20 ሴቶች እንጀራ በመጋገር ተቀጥረው ይሠራሉ።

አዲስ አበባ የሚጋገረው እንጀራ በየቀኑ ወደ ዱባይ ይላካል። ከዱባይ ደግሞ ወደ ሌሎች የአረብ ኤምሬትስ ግዛቶች ይሠራጫል። ይህ የዕለት ተዕለት ተግባር ነው።

ከምግብ ቤት ሥራው በተጨማሪ ለሰዎች እና ለሌሎች ምግብ ቤቶችም እንጀራ ያከፋፍላሉ። “አሁን እንጀራ ከጤና አንጻር ጥሩ ነው ስለሚባል እና የአገሬው ሰውም ስለለመደው አረቦች ሁሉ እየመጡ ይወስዳሉ” ትላለች ሳራ።

የአል ሐበሻ ሬስቶራንት ከተከፈተ ጀምሮ በአማካይ ከስምንት መቶ እስከ አንድ ሺህ ኢትዮጵያውያን ሰዎች ተቀጥረው እንደሠሩ ሳራ ትገምታለች።

አሁንም ከብዙዎቹ ጋር መልካም ግንኙነት እንዳላት የምትገልጸው ሳራ፣ “ወደ አገር ቤት ከተመለሱት መካከል ከ50 በላይ የሚሆኑት የራሳቸውን ድርጅት ከፍተው ትልቅ ደረጃ ላይ ደርሰዋል” ትላለች።

ሳራ የኢትዮጵያን ባሕል በማስተዋወቅም ከፍተኛ ሚና መጫወቷን ታምናለች።

“እስከ ዛሬ ከተቀያየሩት አምባሳደሮች በላቀ አገሬን እንዳስተዋወቅኩ ይሰማኛል” የምትለው ሳራ፣ ከመላው ዓለም ለሚመጡ ደንበኞቿ ኢትዮጵያን እና የኢትዮጵያን ባሕል እንደምትገልጽላቸው ተናግራለች።

በአል ሐበሻ ሬስቶራንት ከኢትዮጵያውያን በተጨማሪ የሌሎች አገራት ዜጎችም ተቀጥረው ይሠራሉ። አንዳንዶቹ አማርኛ አቀላጥፈው መናገር ችለዋል። ሌሎቹ ደግሞ እየተኮላተፉ አንዳንድ ቃላትን ይናገራሉ።

ባንግላዲሻዊው ዳዱ በአል ሐበሻ ሬስቶራንት ረጅም ጊዜ ከሚሠሩ የሌላ አገር ዜጎች መካከል አንዱ ነው።

በአል ሐበሻ ሬስቶራንት16 ዓመታትን ሠርቷል። ለረጅም ጊዜ ያሳለፈው በአስተናጋጅነት ነው። አሁን አሽከርካሪ ሆኗል።

ከኢትዮጵያ የሚላከውን እንጀራ ከዱባይ ወደ ሌሎች የኤምሬትስ ግዛቶች ከሚያሠራጩ አሽከርካሪዎች መካከል አንዱ ነው። አማርኛ አቀላጥፎ ይናገራል።

ከሕንድ የመጣው ሌላኛው ጓደኛውም በአል ሐበሻ 17 ዓመታት ሠርቷል። እርሱም አማርኛ ተናጋሪ ሆኗል። አገራቸው የሚኖሩ ቤተሰቦቻቸውን የሚደጉሙት ከአል ሐበሽ በሚያገኘው ደሞዝ ነው።