“አማራ [ክልልን] የኢንዱስትሪ ማዕከል አድርገናታል”ጠቅላይ ሚኒስትሩ የማብራሪያቸውን ሁለተኛ ክፍል የጀመሩት በሰላም እና ፀጥታ ጉዳዮች ነው። በዚህኛው ክፍል በተለየ መልኩ ስለ አማራ ክልል ሰላም እና ፀጥታ ሰፋ ያለ ማብራሪያ ሰጥተዋል።

በዛሬው ዕለት ለጠቅላይ ሚኒስትሩ ጥያቄ ካቀረቡ አባላት መካከል የአማራ ክልልን ጉዳይ ያነሱት የአማራ ብሔራዊ ንቅናቄ (አብን) ተወካዩ ዶ/ር አበባው ደሳለው ናቸው።

ዶ/ር አበባው፤ “በአሁኑ ሰዓት በመላ አገሪቱ ከፍተኛ የሕዝብ ብሶት አለ። በተለይም በአማራ ክልል ያለው ችግር ደግሞ አጠቃላይ አገሪቱን እኮኖሚያዊ እና ማኅበራዊ ሕይወት ምስቅልቅል እንዲሆን ያደረገ ነው” ሲሉ ተደምጠዋል።

የፓርላማ አባሉ አክለውም “አሁንም ንጹሃን ዜጎች በከባድ መሳሪያ እና በድሮን እየሞቱ ነው። ሲቪል ተቋማት የሚባሉ የጤና ጣቢያ እና ትምህርት ቤቶች እየወደሙ ነው። በአዲስ አበባ፣ በአማራ ክልል እና በተለያዩ አካባቢዎች እስር ቤቶች የተጨናነቁት ያለፍርድ በታጎሩት አማራዎች ነው” ብለዋል።

“መንግሥት የሰላም እና የፀጥታ ችግርን ለመፍታት እየሄደ ያለው አካሄድ ወታደራዊ ነው” ያሉት ዶ/ር አበባው፤ “ፖለቲካዊ አካሄድን ለምን አልደፈረም? ለምንድን ነው ፖለቲካዊ መፍትሔ ላይ መንግሥት የደከመው?” የሚል ጥያቄ አቅርበዋል።

አባሉ መንግሥት “ለእውነተኛ ድርድር እና ውይይት በይፋ ጥሪ አቅርቦ ችግሩን ለምንድን ነው ለመፍታት የማይተጋው? የጅምላ እስር፣ የጅምላ ግድያስ የሚቆመው መቼ ነው?” የሚሉ ጥያቄዎችንም አስከትለዋል።

ጠቅላይ ሚኒስትር ዐቢይ መንግሥታቸው “በተደጋጋሚ” የሰላም ጥሪ ማወጁን ለምክር ቤቱ ገልጸዋል።

“በአማራ አካባቢ ከሚንቀሳቀሱ፣ በኦሮሚያ አካባቢ ከሚንቀሳቀሱ ኃይሎች [ጋር] ንግግር አለ” ያሉት ዐቢይ፤ “ነገር ግን ንግግር የሚያደርጉትን እና ሰላም የሚፈልጉትን ሰዎች እንዴት ትነጋገራለህ ከዚህ መንግሥት ጋር ብለው የሚወቅሱ ሰዎች አሉ” ሲሉ ተናግረዋል።

ዶ/ር አበባው በአማራ ክልል የጅምላ እስር፣ ግድያ እና እንግልት አለ ማለታቸውን ተከትሎ፤ ጠቅላይ ሚኒስትሩ ያላቸው ልምድ ግን ተለየ መሆኑን ጠቁመዋል።

“ባለፉት ስድስት ዓመታት አማራ የኢንዱስትሪ ማዕከል አድርገናታል” ያሉት ዐቢይ፤ “አማራ ክልል የብልጽግና መንግሥት የፈጠረውን ኢንደስትሪ በየትኛውም ዘመን አግኝቶ አያውቅም” ሲሉ ተናግረዋል። ለዚህ ንግግራቸውም የተወሰኑ የአማራ ክልል ከተሞችን እየጠቀሱ የተቋቋሙ ኢንዱስትሪዎችን ዘርዝረዋል።

“የአማራ ክልል ላይ እኛ ልማት ነው እያመጣን ያለነው ልማቱን እንደልባችን እንዳንሰራ ያደናቀፉን ሰዎች ግን አሉ” ያሉት ዐቢይ፤ “እዚያ የሚፈሰው ጥይት ድካም ተሰብስቦ በጣም ብዙ ቁም ነገር ሊሠራ ይችላል” ብለዋል።

ከጅምላ እስር ጋር በተያያዘ ለተነሳላቸው ጥያቄ ዐቢይ “በጅምላ የፓርላማ አባላት፣ በጅምላ የፖለቲካ ሰዎች የምናስር ቢሆን እርስዎም ይታሰሩ ነበር። በጅምላ አይደለም በግብር ነው ሰው የሚታሰረው” የሚል ምላሽ ሰጥተዋል።

“ሥራቸው የብላክ ማርኬት ማሯሯጥ የሆኑ ኢምባሲዎች አሉ”

ከሰላም እና ከፀጥታ እንዲሁም ዲፕሎማሲ ጉዳዮች በተጨማሪ በኢኮኖሚ ጉዳዮች ላይም ሰፋ ያለ ማብራሪያዎችን ሰጥተዋል። የዐቢይ የኢኮኖሚ ማብራሪያ ሰፊውን ጊዜ የወሰደው ባለፈው ዓመት መጨረሻ ተግባራዊ መደረግ የጀመረው “የኢኮኖሚ ሪፎርም” ላይ ነው።

መንግሥታቸው “ሪፎርም” የጀመረው “አገር በቀል የኢኮኖሚ ማሻሻያ አንድ” እና “አገር በቀል የኢኮኖሚ ማሻሻያ ሁለት” ብሎ መሆኑን ዐቢይ ለምክር ቤት አባላት አስታውሰዋል።

ባለፈው ዓመት መጨረሻ መተግበር ጀመረው የፖሊሲ ለውጥ “እነዚያን ሪፎርሞች የቋጨንበት ለቀሪ ሥራዎች መቋጫ ያበጀንበት የመጨረሻው የሪፎርሙ አካል ነው እንጂ አሁን የተጀመረ ሪፎርም አይደለም” ብለዋል።

ጠቅላይ ሚኒስትሩ አክለውም “ይሄ ሪፎርም እውነት ለመናገር ቀድሞ መጀመር ነበረበት በጣም ነው የዘገየው፤ ኢትዮጵያን አይመጥንም” ሲሉ ተደምጠዋል።

“የኢትዮጵያ ንግድ ባንክ በዚህ ሪፎርም በጣም ተጠቃሚ ከሆኑ ተቋማት አንዱ ነው” ያሉት ዐቢይ፤ “ይህ ሪፎርም ባይሠራ የኢትዮጵያ ንግድ ባንክ ይፈርስ ነበር” ብለዋል።

የኢትዮጵያ ንግድ ባንክ “በዚህ ሪፎርም 900 ቢሊዮን ብር የተራዘመ ቦንድ” ማግኘቱን ገልጸዋል።

“ንግድ ባንክ ወደቀ ማለት ኢትዮጵያ ውስጥ 30ውም ባንኮች ወደቁ ማለት ነው። ዋናው የኢትዮጵያ ባንክ ንግድ ባንክ ነው፤ እሱን ማዳን የባንክ ሴክተሩን ማዳን ነው” ሲሉ “የኢኮኖሚ ሪፎርሙ” ለባንክ ዘርፉ ያለውን ሚና አብራርተዋል።

ጨምረውም ከውጭ ምንዛሬ እና ትዩዩ ገበያ ጋር በተያያዘ ባንኮችን፣ ኤምባሲዎችን እና ኩባንያዎችን በኃይለ ቃል ወቅሰዋል።

“ባንኮች ኮሚሽን ስለለመዱ፣ በትክክለኛው ሕጋዊ መንገድ ከሚሠራው ይልቅ የትይዩ ማርኬት ውስጥ ተዋናይ መሆን ስለሚጠቅማቸው የኢትዮጵያ የፋይናሻል ሥርዓት ጤናማ በሆነ መንገድ እንዳያድግ የሚያበላሹ ግለሰቦች እና ቡድኖች አሉ፤ እነዚህ በባንክ ስም የሚዘርፉ ናቸው” ሲሉ ተደምጠዋል።

“ባንኮች ሕግ እና ሥርዓት አክብረው የኢትዮጵያን የኢኮኖሚ እድገትን በሚያረጋግጥ መንገድ ሊሠሩ ይገባል እንጂ በባንክ ስም የአራጣ ሥራ የሚሠሩ ከሆነ ችግር ነው” ብለዋል።

ከባንኮች በመቀጠል ዐቢይ ወቀሳ ያቀረቡባቸው በውጭ አገራት ያሉ የአገሪቱን ኤምባሲዎችን ነው።

በዚህ ወቀሳቸው “ቀጥ ብለው የኢትዮጵያን ሀብት የመዝረፍ እና የውጭ ምንዛሬ ቢዝነስ የሚሠሩ ኢምባሲዎች አሉ” ብለዋል። አክለውም “ሥራቸው ይሄ የሆነ ላይም ጥብቅ ክትትል ይደረጋ የማይታረሙ ከሆነ እርምጃ ይወሰዳል” ሲሉ አስጠንቅቀዋል።

“ጤናማ ዝምድና የማያደርግ የትኛውንም ኤምባሲ እኛ አንፈልግም” ያሉት ዐቢይ፤ “እኛ የምንፈልገው ጤናማ ሕጋዊ ሥርዓት ያለው መንገድ የሚከተልን ብቻ ነው። ያን ሥራ የሚሠሩ ነገር እንዳናበላሽ የታገስናቸው ሥራቸው ግን የብላክ ማርኬት ማሯሯጥ የሆኑ ኢምባሲዎች አሉ” ብለዋል።

በድህረ ገጻችን ኢትዮ አማዞን በመግባት የሚፈልጉትን እቃ ማዘዝ  ብቻ  ሳይሆን የርስዎንም እቃዎች መሸጥ እንደሚችሉ ስናሳውቅዎት በደስታ ነው ። ለማስታወቂያ ወይንም ለመግቢያ ምንም ክፍያ አይጠበቅብዎትም፤  ለተጨማሪ መረጃ   ድህረ ገጻችንን ይጎብ/ኙ። https://ethio-amazon.com/

ለበለጠ መረጃ ሊንኩን በመንካት የቴሌግራም ግሩፓችንን ይቀላቀሉ!https://t.me/ethioamazon

ምንጭ፡– (ቢቢሲ)