ምንም እንኳ ሴኔጋል ከአውሮፓውያኑ 2010 ጀምሮ ጠንካራ የሚባል ምጣኔ ሀብት ብታዳብርም ከአገሪቱ ሕዝብ ከአንድ ሦስተኛው በላይ አሁንም በደህነት ይማቅቃል ይላል የዓለም ባንክ መረጃ።

“ሁሉንም ዓይነት ሥራ ሠርቻለሁ። ቢሆንም ሊሞላልኝ አልቻለም። ገንዘብ ከሌለህ ዋጋ የለህም። [ለቤተሰቦቼ] ያለኋቸው እኔ ነኝ ግን እጄ ላይ ገንዘብ የለም” ይላል።

ልክ እንደ ሞሐመድ ሁሉ በርካታ ስደተኞች ድህነት እና ግጭት በመሸሽ ከአፍሪካ አገራት ወደ አውሮፓ ይሻገራሉ።

የካናሪ ደሴቶች አውሮፓ መግባት ለሚሹ ስደተኞች እና ጥገኝነት ጠያቂዎች ዋናዋ መዳረሻ ሆናለች። ጣሊያን እና ግሪክ በሜዲቴራኒያን ባሕር በኩል ከሊቢያ እና ከቱኒዚያ የሚመጡ ስደተኞችን አንቀበለም ማለታቸውን ተከትሎ ነው ስደተኞች ፊታቸውን ወደ ካናሪ ያዞሩት።

በአውሮፓውያኑ 2023፤ 40 ሺህ ገደማ ስደተኞች ወደ ካናሪ ደሴት አቅንተዋል። ይህ በሦስት አስርት ዓመታት ታሪክ ትልቁ ቁጥር ነው። በያዝነው የአውሮፓውያኑ ዓመት 31 ሺህ የሚሆኑ ስደተኞች ገብተዋል።

የአትላንቲክ ውቅያኖስ የአየር ሁኔታ ሲሻሻል ሁኔታዎች “እየከፉ ሊመጡ” ይችላሉ ይላል የደሴቷ አስተዳደር።

የካናሪ ደሴቶች ፕሬዝንት የሆኑት ፈርናንዶ ክላቪሆ፤ የውቅያኖሱ የአደጋ ጊዜ ሠራተኞች፣ ፖሊስ እና የቀይ መስቀል በጎ ፈቃደኞች ከአቅማቸው በላይ ሆኖባቸዋል ሲሉ ለቢቢሲ አፍሪካ አይ ይናገራሉ።

“በርካታ ሰዎች መሞታቸው አይቀርም። ስደተኞችን መርዳታ ሊያቅተን ይችላል። ስደተኞቹ እርዳታ ሊደረግላቸው ይገባል” ይላሉ።

“በአሁኑ ወቅት በሜዲቴራኒያን በኩል ወደ አውሮፓ መግባት አይቻልም። ይህ ማለት በጣም አደገኛ በሚባለው በአትላንቲክ ውቅያኖስ በኩል ነው ሰዎች የሚመጡት ማለት ነው።”

ቢቢሲ ያናገራቸው ስማቸው እንዳይጠቀስ የፈለጉ የስፔን የአደጋ ጊዜ ሠራተኞች በሁኔታው እጅግ ጉልበታቸው እንደዛለ ይናገራሉ።

አንድ ግለሰብ “የአደጋ ጊዜ ሠራተኞች ሞት ማየት ሰልችቷቸዋል” ይላሉ።

ከካናሪ ደሴቶች መካከል ትንሿ ደሴት ኤል-ሂየሮ ትባላለች። ከ2023 ጀምሮ ወደ ደሴቷ የሚመጡ ሰዎች ቁጥር የሕዝቡን ብዛት እጥፍ አድርጎት 30 ሺህ አድርሶታል።

የደሴቶቹ ፕሬዝደንት እንደሚሉት የሕዝብ ማመለሻ አውቶቡሶች ስደተኞችን ለማመላለስ ጥቅም ላይ ስለሚውሉ ዜጎች የሕዝብ ትራንስፖርት መጠቀም አልቻሉም። ይህ ሁኔታ ወደ መጤ ጠልነት እና ማኅበረሰባዊ ነውጥ እንዳይሻገር ፍርሀት እንዳላቸው ይናገራሉ።

ስደተኞች ቁጥራቸው መብዛቱን ተከትሎ በስፔን አገራዊ ክርክር እየተካሄደ ይገኛል። ሕገ ወጥ ስደትን እንዴት መከላከል እና ለስደተኞች በተለይ ብቻቸውን ላሉ ሕፃናት እንክብካቤ ማድረግ እንደሚቻል ውይይት እየተደረገ ነው።

ሞሐመድ በስተመጨረሻ በሕገ-ወጥ ሰው አዘዋዋሪዎቹ ጀልባ አስፈሪውን የባሕር ላይ ጉዞ የሚጀምርበት ወቅት ተቃርቧል። ከዚህ በኋላ ዕጣ ፈንታው በእነሱ እጅ ነው።

“በጣም ብዙ ነን። ከጊኒ እና ከማሊ የመጡ ሰዎችም አሉ። በትናንሽ ጀልባ 10 እና 15 እያደረጉ ወስደውን ተለቅ ያለው ጀልባ ላይ ተሳፈርን። ከዚያ መንገዳችንን እንጀምራለን” ይላል።

ረዥሙን ጉዞ በድል ለመውጣት የሚያስችለውን ውሀ የሞላ ኮዳ እና የተወሰኑ ብስኩቶች ይዟል።

የመጀመሪያዎቹን ሁለት ቀናት በህመም ሲናወጥ ቆየ። ጀልባዋ በሰዎች ስለተጨናነቀች ብዙውን ጊዜውን ቆሞ ነው የሚያሳልፈው። የሚተኛው ደግሞ ውሀ እና ነዳጅ የተደባለቁበት መደብ ላይ ነው።

የያዘውን ኮዳ ውሀ በመጨረሱ ከውቅያኖሱ እየጨለፈ ለመጠጣት ተገዷል።

አንዳንድ ሰዎች በድንጋጤ እና በፍርሀት መጮህ ጀምረዋል።