ግጭቱ ከምሽት ጅሮ አስከ እኩለ ሌሊት የተካሄደ በመሆኑ ከተማዋን ለሰዓታት ካናወጠው ተኩስ ውጪ ነዋሪዎች ምን እንደተከሰተ የሚያውቁት ነገር እንደሌለ ገልጸዋል።

ባለፉት ጥቂት ቀናት በወልዲያ ከተማ ጋብ ብሎ የተነበረው የተኩስ ልውውጥ ባገረሸበት የእሁዱ ግጭት በሰላማዊ ሰዎች ላይ ጉዳት ስለመድረሱ እስካሁን የታወቀ ነገር የለም።

ሆኖም በግጭቱ ከሁለቱ ተፋላሚ ኃይሎች የተገደሉ ሰዎች ሳይኖሩ እንደማይቀሩ ነዋሪዎች ጠቁመዋል።

በተለይም ብርቱ የተኩስ ልውውጥ በነበረበት ስታዲሙ አካባቢ ይገኛል በተባለ ‘አጣና ተራ’ በተባለ ስፍራ ከተፋላሚ ኃይሎች የተጎዱ ሰዎች አሉ ብለዋል።

“የተጎዳ፤ የተመታ ሰው እንዳለ በድምጽ እንሰማ ነበር። ነገር ግን ከየትኛው ወገን እንደሆነ፤ ምን ያህል እንደሆነ አላወቅንም” ሲሉ አንድ ነዋሪ ተናግረዋል።

የሰሜን ወሎ ዞን ዋና መቀመጫ ወልዲያ ባለፉት ቀናት ባለ ሦስት እግር ተሽከርካሪዎችን (ባጃጅ) ጨምሮ በትራንስፖርት ገደብ፣ ወከባ እና በዘፈቀደ እስር “ከፍተኛ ቁዝምት” ላይ ናት ብለዋል።

የእሁዱን ጥቃት ተከትሎ ዛሬ ሰኞ ጥቅምት 04/2017 በከተማዋ መደበኛ እንቅስቃሴ መቀጠሉን የተናገሩት ነዋሪዎች፤ የንግድ መደበሮችን ጨምሮ በወልዲያ “እንቅስቃሴ አለ” ብለዋል።

“ቀድሞም እንቅስቃሴው ስለተናወጠ ምንም አዲስ የተጨመረ አይመስልም። [ሰሞኑን] የትራንስፖርት እንቅስቃሴ ስለተገታ ሁኔታው የተለመደ ነው” ሲሉ አንድ ነዋሪ ተናግረዋል።

“ባንኮችን ጨምሮ ሁሉም እንቅስቃሴ አለ፤ እየሠሩ ነው” ያሉ ሌላ ነዋሪ ደግሞ የመንግሥት የፀጥታ ኃይሎች የተለመደ ነው ያሉትን እንቅስቃሴ እያደረጉ ነው ብለዋል።

“ከነጋ የፓትሮል እንቅስቃሴ አለ። መደበኛው የተለመደው ሁኔታ ነው ያለው” ሲሉ ነዋሪዎች በስጋትም ቢሆን እንቅስቃሴዎች ስለመቀጠላቸው ተናግረዋል።

ሐምሌ መጨረሻ 2015 ዓ.ም. በመንግሥት እና በፋኖ ኃይሎች መካከል ግጭት ከተቀሰቀሰ በኋላ በተደጋጋሚ ውጊያ ከሚደረግባቸው ከተሞች ውስጥ ወልዲያ ትጠቀሳለች።

የፋኖ ኃይሎች ወደ ከተማዋ ዘልቀው በመግባት ማረሚያ ቤቶችን ከመስበር ጀምሮ በአካባቢው የመንግሥት ባለሥልጣናት ላይ ያነጣጠሩ የቦምብ ጥቃቶችን ተፈጽመዋል።

በድህረ ገጻችን ኢትዮ አማዞን በመግባት የሚፈልጉትን እቃ ማዘዝ  ብቻ  ሳይሆን የርስዎንም እቃዎች መሸጥ እንደሚችሉ ስናሳውቅዎት በደስታ ነው ። ለማስታወቂያ ወይንም ለመግቢያ ምንም ክፍያ አይጠበቅብዎትም፤  ለተጨማሪ መረጃ   ድህረ ገጻችንን ይጎብ/ኙ። https://ethio-amazon.com/

ለበለጠ መረጃ ሊንኩን በመንካት የቴሌግራም ግሩፓችንን ይቀላቀሉ!https://t.me/ethioamazon

ምንጭ፡– (ቢቢሲ)