ቢቢሲ፡ እሺ ቀጥለን ከመስከረም 26/2016 ዓ.ም. በኋላ የተከሰተውን እንመልከት። ይኸው ከአንድ ዓመት በኋላ ጋዛ ፈራርሳለች። ከ40 ሺህ በላይ ሰዎች ተገድለዋል። በርካቶቹ ሰላማዊ ሰዎች ናቸው። የእርስዎ ቡድን እስራኤልን የመዋጋት አቅሙ ተዳክሟል። ግጭት መቀስቀሳችሁ ትክክል ነበር? ይሄ ይሆናል ብላችሁስ ጠበቃችሁ ነበር?

ኻሊል፡ ለዚህ ሁሉ ጥፋት ተጠያቂው ማነው? ወራሪው ኃይል እና ወታደሮቹ ናቸው። ጋዛን ማነው ያፈራረሳት? ሕዝቧን ማን ነው የገደለው? አሁንስ መጠለያዎች፣ ትምህርት ቤቶች እና ሆስፒታሎች ውስጥ ያሉ ሰላማዊ ዜጎችን እየገደለ ያለው ማነው?

የተቀረውን ዓለም ጠይቅ – ዓለም አቀፍ ሕግ አውጥተናል የሚሉትን ጠይቅ። እኛ ራሳችንን እየተከላከልን ነው ያለነው። ከወራሪው ኃይል 1200 ሰዎች ከተገደሉ እንዴት ነው እስራኤል 50 ሺህ ሰዎችን መግደሏ ምክንያታዊ የሚሆነው? ጋዛን ማፈራረሷ ምክንያታዊ የሚሆነው? በቂያቸው አይደለም ማለት ነው? እነሱ እኛን ገድለው ለመጨረስ ባላቸው ጥማት ነው የሚነሳሱት፤ የመውረር እና የማጥፋት ጥም።

ቢቢሲ፡ እስራኤሎች የጦርነት ሕግን እናከብራለን እያሉ ነው። በርካታ ሰላማዊ ዜጎች የተገደሉት ሐማስ በሰላማዊ ሰዎች መካከል እየተደበቀ ስለሚዋጋ ነው ይላሉ። ሰላማዊ ዜጎችን እንደ ምሽግ እየተጠቀማችሁም ነው ይላሉ።

ኻሊል፡ ይህ ፍፁም ሐሰት ነው። መስጂድ አውድመዋል። ውስጡ ተዋጊዎች አልነበሩም። መኖሪያ ቤቶች አወድመዋል፤ ሕንፃዎችን አፈራርሰዋል። በውስጣቸው ማንም አልነበረም። ቤቶች ላይ ቦምብ ሲጥሉ በውስጡ ማንም ተዋጊ አልነበረም። ይህ የእስራኤል ፕሮፖጋንዳ ነው።

ቢቢሲ፡ ስለታገቱት ሰዎች ማውራት እንችላለን? ሕፃናት እና ሴቶችን ጨምሮ ከ250 በላይ ሰዎች አግቶ መውሰድ አስፈላጊ ነበር?

ኻሊል፡ የጥቃቱ አንዱ ዓላማ የነበረው ጥቂት የእስራኤል ወታደሮችን አግቶ በእስር ላሉ ፍልስጤማውያን ማስፈቻ ማዋል ነበር። ነገር ግን የጋዛ ክፍል በተዋጊዎቻችን ፊት አመድ ሲሆን በርካታ ታጋቾችን ወሰድን። ሕፃናት እና ሴቶችን ጨምሮ ሰላማዊ ዜጎችን ማገት ዓላማችን አልነበረም።

ቢቢሲ፡ ከታገቱት ሰዎች መካከል የተወሰኑ ሴቶች ወሲባዊ ጥቃት ደርሶብናል ይላሉ።

ኻሊል፡ የተዋጊዎቻችን እና የሁሉም ፍልስጤማውያን ሥነ-ምግባር ሰብዓዊነት ነው። የእስልምና ሃይማኖት እና ባሕል እንዲሁም ብሔራዊ ሥልጣኔን ተምረን ነው ያደግነው። ራሳችንን እንደምንጠብቀው ሁሉ እንጠብቃቸዋለን። ወሲባዊም ሆኑ ወሲባዊ ያልሆኑ ጥቃቶች የሚባሉት ውሃ የማያነሱ ናቸው።

ቢቢሲ፡ አይደለም። አንዳንድ ሴቶች ወሲባዊ ጥቃት ደርሶብናል ብለዋል። በተለይ በኖቫ የሙዚቃ ፌስቲቫል ላይ የተሳተፉ ወጣት ሴቶች። በጥቃቱ ዕለት እና ከዚያ በኋላ ወሲባዊ ጥቃት ደርሶብናል የሚሉ ሴቶች ቁጥር በርካታ ነው። ማስረጃም አለ።

ኻሊል፡ እንዳልኩህ መመሪያው ግለፅ ነበር። በአንዳንድ ኃላፊነት በጎደላቸው ሰዎች አስነዋሪ ድርጊቶች ተፈፅመው ሊሆን ይችላል። ነገር ግን አልተረጋገጠም።

ቢቢሲ፡ የተኩስ አቁም ጉዳይስ? እስራኤል በትክክለኛው መንገድ ከተሄደ የተኩስ አቁም ስምምነት እፈርማለሁ ብላለች። የታገቱ ሰዎችን መልሳችሁ የተኩስ አቁም ስምምነት ተፈርሞ ጦርነቱ ቢቆም – ይሄን ይቀበላሉ? በዚህ ጉዳይ ላይ ውይይት እንደነበር አውቃለሁ።

ኻሊል፡ ጥያቄው መቼ ነው ኔታኒያሁ ጦርነቱን የሚያቆመው? የሚል ነው። መቼ ነው ዓለም አቀፉ ማኅበረሰብ ጦርነቱን እንዲያቆም የሚያስገድደው? ጦርነቱን የማቆም ጉዳይ ይሄ የኔታኒያሁ እና የወራሪዊ የእስራኤል ውሳኔ ነው።