ሐማስ በእስራኤል ይዞታ ላይ ጥቃት አድርሶ ከአንድ ሺህ ሁለት መቶ በላይ ሰዎችን የገደለበት ዕለት አንድ ዓመት ሞላው።

እስራኤል በወሰደችው የአጸፋ እርምጃ ከ41ሺህ በላይ ፍልስጤማውያንን ገድላለች። ከእነዚህ ውስጥ 16ሺህ የሚሆኑት ሕጻናት ናቸው።

ያቺ ክፉ ቀን በአውሮፓውያኑ ጥቅምት 7/2023 (መስከረም 26/2026 ዓ.ም.) ቅዳሜ ቀን ነበር የዋለችው።

ሐማስ እንዴት በጥብቅ የሚጠበቀውን የእስራኤልን ድንበር ጥሶ ገብቶ ያን የመሰለ መብረቃዊ ጥቃት ሊያደርስ ቻለ? ዛሬም ድረስ ያልተመለሰ ጥያቄ ነው።

ቢቢሲ በዚያች ዕለት ከጋዛ ጋር በምትዋሰን የእስኤራል ወታደራዊ ቀጠና ምን እንደሆነ ያዩ ሰዎችን አነጋግሯል።

የድንበሩ የዕዝ ጣቢያ ‘ናሓል ኦዚ’ ተብሎ ይጠራል።

በዚያች ዕለት ማለዳ የሐማስ ወታደሮች ይህን ወታደራዊ ጣቢያ ተቆጣጠሩት። 60 የእስራኤል ወታደሮቸን ገደሉ። ሌሎቹን ደግሞ አፍነው ወሰዱ።

የእስራኤል መከላከያ እስከ አሁን በዚያች ዕለት ማለዳ ስለሆነው ነገር የተብራራ ምርመራ አድርጎ የተብራራ መግለጫ አላወጣም።

ቢቢሲ ይህን መረጃ ያገኘው ቤተሰብ የተገደሉባቸው ሰዎች ከተሰጣቸው ማብራሪያ በመነሳት ነው።

በዕለቱ እዚያ የነበሩ፣ ነገር ግን ከሞትም ከእገታም በተአምር ያመለጡ ሰዎችን አነጋግሯል።

ከዚህ በተጨማሪ ጥቃቱ ሲካሄድ ከመገደላቸው በፊት የድምጽ መልዕክት የተዉ ዜጎችን እና ወታደሮችን ለማካተት ተሞክሯል።

እነዚህን መረጃዎች ቀጣጥሎ በመስፋት ቢቢሲ የሚከተለውን ውጤት አግኝቷል፦

ከሌሊቱ 10፡ 00 ሰዓት

ሻሮን በዚያች ዕለት በናሃል ኦዚ የጦር ማዘዣ ጣቢያ ፈረቃዋን ጀመረች። ጣቢያው ከጋዛ ድንበር በአንድ ኪሎ ሜትር ይርቃል።

ሻሮን የቀጠናው ሙሉ ሴቶች ብቻ ያሉበት የወታደሮች ቡድን አባል ናት። የእነዚህ ሴቶች ሥራ ቀጥታ በካሜራ በድንበር አካባቢ ያሉ እንቅስቃሴዎችን መከታተል እና መተንተን ነው።

የእነዚህ ሴቶች ሥራ በፈረቃ ሲሆን፣ 24 ሰዓት ሙሉ የካሜራ ክትትል ማድረግ ይጠበቅባቸዋል።

በዚያች ማለዳ አንዳቸውም አልታጠቁም ነበር።

ጄኔራል ኢዝራኢል ዚቭ የቀድሞ የእስራኤል መከላከያ አባል ነው። ለቢቢሲ እንደሚናገረው፣ ድንበር አካባቢ ወታደር ያለ መሣሪያ ትጥቅ ታይቶ እና ተሰምቶ አያውቅም።

የሐማስ ወታደሮች ሁልጊዜም ከድንበር ማዶ ይንቀሳቀሳሉ። ከዚያች ዕለት ቀደም ብሎ በነበሩ ጥቂት ቀናት ግን ሁሉም ነገር ፀጥ አለ።

“በጣም አስፈሪ ነበር ፀጥታው። ምንም እንቅስቃሴ ማየት አቆምን” ይላል በወቅቱ የነበረ አንድ ወታደር። “የሆነ ልክ ያልሆነ ነገር ያለ ይመስል ነበር፣ ድንበሩ እንዲህ ፀጥ ረጭ ሊል አይችልማ።”

የቀድሞ የእስራኤል ወታደራዊ መኮንን ግን እነዚህ ግራ የሚያጋቡ ምልክቶች ቸል የተባሉት የእስራኤል መከላከያ ሐማስን በከፍተኛ ሁኔታ ስለሚንቀው ነው።

“ንቀት ነው ጉድ የሠራቸው። ሐማስ ጥቃት ለማድረስ አይደፍርም፤ ማድረስ ቢፈልግም አቅም የለውም” የሚል ከፍተኛ ንቀት የነበረ ይመስለኛል” ይላል።

ነገሩን በአጭር ሲገልጽ እንዲህ ይላል “በመስከረም 25 ማታ [የጥቃቱ ዕለት ዋዜማ] ወዲያ ማዶ ድመት አለች ብለን ተኛን። መስከረም 26 ስንነቃ ግን ነብር ሆና ጠበቀችን።”