ናስራላህ ከተገደሉ በኋላ ቃሴም መስከረም ማብቂያ ላይ በሊባኖስ የተኩስ አቁም እንዲደረስ የሚደረገውን ጥረት ቡድናቸው እንደሚደግፍ የገለጹበትን ጨምሮ ሦስት ጊዜ በቴሌቪዥን የተላለፈ ንግግር አድርገዋል።

አዲሱ የሄዝቦላህ መሪ የናስራላህን ያህል ተጽእኖ የመፍጠር ግርማ አላቸው ብለው በርካታ ሊባኖሳውያን አያስቡም።

ናይም ቃሴም በመሪነት መሰየማቸውን ተከትሎ የእስራኤል መንግሥት በይፋዊ የአረብኛ የኤክስ ገጹ ላይ ባሰፈረው መልዕክት በቡድኑ የመሪነት ቦታ ላይ የሚቆዩት ለአጭር ጊዜ ብቻ ሊቆዩ እንደሚችሉ ዝቷል።

“[ቃሴም] እንደቀደሙት የሐሳን ናስራላህ እና የሐሼም ሳፌዲንን ዱካ የሚከተል ከሆነ በሽብርተኛው ድርጅት ታሪክ በመሪነት ቦታው ለአጭር ጊዜ የቆየው ግለሰብ ይሆናል” ብሏል።

ጨምሮም የሄዝቦላህ ያለው ወታደራዊ ኃይል ካልፈራረሰ በስተቀር በሊባኖስ ውስጥ መፍትሄ አይኖርም በማለት የእስራኤልን ዓላማ ገልጿል።

እስራኤል እና ሄዝቦላህ በጋዛ የተቀሰቀሰውን ጦርነት ተከትሎ ለአንድ ዓመት ያህል ድንበር ተሻጋሪ የከባድ መሳሪያ ግጭቶች እና የአየር ድብደባ ሲያካሂዱ ከቆዩ በኋላ ነው ወደለየለት ጦርነት የገቡት።

እስራኤል በሄዝቦላህ የሚሳዔል፣ የሮኬት እና የድሮን ጥቃቶች ምክንያት ከሰሜናዊ ግዛቶቿ የተፈናቀሉ ዜጎቿን ለመመለስ እና ደኅንነታቸውን ለማስጠበቅ በሚል አንድ ወር ያለፈው የአየር እና የእግረኛ ሠራዊት ጥቃት በሊባኖስ ውስጥ እያካሄደች ነው።

ግጭቱ ከተቀሰቀሰ በኋላ ባለው በአንድ ዓመት ውስጥ ቢያንስ 2 ሺህ 464 ሊባኖሳውያን ሲገደሉ ወደ 12,000 የሚጠጉት ደግሞ የመቁሰል ጉዳት እንደደረሳባቸው የሊባኖስ የጤና ሚኒስቴር አስታውቋል።

በተመሳሳይ ጊዜ ሄዝቦላህ በሺዎች የሚቆጠሩ ሮኬቶች እና ድሮኖችን በመጠቀም በእስራኤል ላይ ጥቃት የፈጸመ ሲሆን፣ ቢያንስ 59 እስራኤላውያን በሰሜናዊ የአገሪቱ ክፍል እና በወረራ በያዘችው የጎላን ተራሮች አካባቢ መገደላቸውን ሮይተርስ ዘግቧል።

በድህረ ገጻችን ኢትዮ አማዞን በመግባት የሚፈልጉትን እቃ ማዘዝ  ብቻ  ሳይሆን የርስዎንም እቃዎች መሸጥ እንደሚችሉ ስናሳውቅዎት በደስታ ነው ። ለማስታወቂያ ወይንም ለመግቢያ ምንም ክፍያ አይጠበቅብዎትም፤  ለተጨማሪ መረጃ   ድህረ ገጻችንን ይጎብ/ኙ። https://ethio-amazon.com/

ለበለጠ መረጃ ሊንኩን በመንካት የቴሌግራም ግሩፓችንን ይቀላቀሉ!https://t.me/ethioamazon

ምንጭ፡– (ቢቢሲ)