ቭላድሚር ፑቲን ለአምስተኛ ጊዜ ከታላቁ ክሬምሊን ቤተ መንግስት ወደ ሴንት አንድሪው የዙፋን አዳራሽ የተዘረጋውን ረዥም መንገድ በእግር ተጉዘዋል።

አዳራሹ ደርሰው ቃለ መሃላ ፈጽመው ለቀጣይ ስድስት ዓመታት የሩሲያ ፕሬዝዳንት ሆነው ሆነው መቀጠላቸውን አረጋግጠዋል።

ፕሬዝዳንት ፑቲን በስፍራው ለተሰባሰቡት ሚኒስትሮች እና ሹማምንት “አንድ እና ታላቅ ህዝብ ነን። ሁሉንም መሰናክሎች እናልፋለን፤ ሁሉንም ዕቅዶቻችንን እናሳካለን፤ እናም አብረን እናሸንፋለን” ብለዋል።

ፑቱን የቀይ ምንጣፍ ጉዞውን በተደጋጋሚ አድርገውታል ። እአአ ግንቦት 2000 ለመጀመሪያ ጊዜ በዓለ ሲመታቸውን ካከናወኑበት ስነ-ስርዓት በኋላ ብዙ ነገር ተለውጧል።

በወቅቱ ፕሬዝዳንት ፑቲን “ዲሞክራሲን ለመጠበቅ እና ለማሳደግ፤ ሩሲያን የተሻለች ለማድረግ” ቃል ገብተው ነበር።

ከሃያ አራት ዓመታት በኋላ የክሬምሊኑ ቁንጮ በዩክሬን ላይ ጦርነት ከፍተዋል። ያውም ሩሲያ ላይ ከባድ ኪሳራ ያደረሰባት ጦርነት። ፕሬዚደንት ፑቲን ዴሞክራሲን ከማጎልበት ይልቅ እየገደቡት ነው። ተቺዎችን ማሰር፣ የሌሎች የመንግስት አካላትን ሚና በመገደብ ላይ አነጣጥረዋል።

“ፑቲን እራሱን እንደ ታላቁ ቭላድሚር፣ እንደ ሩሲያ ቄሳር አድርጎ ያስባል” ሲሉ የቀድሞ የዋይት ሃውስ የብሔራዊ ደህንነት አማካሪ ፊዮና ሂል ተናግረዋል።

“የመጀመሪያዎቹን ሁለት የፕሬዚዳንትነት ዘመናቸውን ከተመለከትን ስለ ፑቲን ጥሩ ግምገማ የሚኖረን ይመስለኛል። አገሪቷን በፖለቲካ የተረጋጋች እንድትሆን አድርጓታል። የሩሲያ ኢኮኖሚ እና ስርዓት መንግስት ከቀደሙት ዓመታት ሁሉ በተሻለ ሁኔታ አፈጻጸም ነበረው።”

“ከዛሬ 10 አመት በፊት ክሪሚያን ወደ ሩሲያ ግዛትነት ከመለስ በኋላ ግን አቅጣጫው በአስደናቂ ሁኔታ ተቀየረ። እሱ እራሱን ከችግር ፈቺነት ይልቅ ወደ ኢምፔሪያሊስት እንዲቀየር አድርጎታል።”

ለአምስተኛ ጊዜ ቃለ መሃላ የፈጸሙት ፑቲን በዘውድ በአዳራሹ ውስጥ ብዙ ደጋፊዎች አሏቸው።

“ፑቲን ሩሲያን ወደ ድል እየመራው ነው” ሲሉ የሩሲያ የፓርላማ አባል ፒዮትር ቶልስቶይ ተናግረዋል።

“ድል ምንድን ነው?” የሚል ጥያቄ ቀረበላቸው።

“ድል ማለት ብሪታንያ እና ምዕራባውያን ሩሲያ ልዕለ ኃያል መሆኗን ሲገነዘቡ እና የሩሲያን ብሔራዊ ጥቅም ሲገነዘቡ ነው” ምላሽ ሰጡ።

“ምዕራባውያን ይህንን ካላደረጉስ?” ቀጣዩ ጥያቄ ነበር።

“ከዚያ በኋላ የምዕራቡ ዓለም መጨረሻ ይሆናል” ሲሉ የፓርላማው አባል ደመደሙ።

በክሬምሊን ቤተ መንግስት ውስጥ ከፕሬዚዳንት ፑቲን ትልቅ አድናቂዎች አንዱን ተገኝተዋል። የሩስያ የታችኛው ምክር ቤት አፈ-ጉባኤ የሆኑት ቭያቼስላቭ ቮሎዲን ናቸው።

“ፑቲን ካለ ሩሲያ አለች፣ ፑቲን ከሌለ ሩሲያ የለችም” በሚለው ንግግራቸው ታዋቂ ሆነዋል።

“የምዕራቡ ዓለም የምትፈራርስ ደካማ ሩሲያን ማየት ይፈልጋል። ፑቲን ግን እንቅፋት ሆነባቸው” ብለዋል ቮሎዲን።

ቭላድሚር ፑቲን ወደ ስልጣን ከመጡ በኋላ አሜሪካ አምስት የተለያዩ ፕሬዚዳንቶች እና ብሪታንያ ደግሞ ሰባት ጠቅላይ ሚኒስትሮች ቀያይራለች።

ሩሲያን ለሩብ ምዕተ-ዓመት የሚጠጋ ጊዜ ከመሩ በኋላ በእርግጠኝነት አሻራቸውን ማሳረፍ ችለዋል። ቀደም ባሉት ጊዜያት ሰዎች ስለ “ብሬዥኔቪዝም”፣ “ጎርባቼቪዝም” ወይም “የልስኒዝም” እምብዛም አይናገሩም።